ناقش كتاب عايزة أتجوز عايزة أتطلق مشكلة تعدد الزوجات بين الرجل والمرأة، قائلا :”يردد الرجل أمام مراته بأن الشرع حلل أربعه، رغم أن حياتهم هاديه وسعيدة وربنا رزقهم ب ٣ أو ٤ عيال وعايشين مرتاحين ومستقرين وهو مصمم يفقدها الإحساس بالأمان ويقولها الشرع_حلل_أربعة وأنه يرغب فى التعدد ونفسه يتجوز عروسة جديدة ونسى أن الشرع حلل للمرأة أشياء أخرى زي ما حلل له التعدد” !!!
وبعد ما تقع الفأس في الرأس ويتجوز عليها يبدأ يفهم يعني أيه الشرع حلل للمرأة أشياء أخرى، الشرع حلل لها طلب الطلاق وحلل لها طلب الخلع وأن استمرار بقائها في حياة الراجل بعد ما أتجوز عليها أمر متروك لاختيارها هي بس لو تقبل تكمل .
المشكلة أنها بعد ما تخلعه بحكم قضائي لأنه رفض يطلقها بالمعروف تكون بدأت لذة النشوة بالزوجة الجديدة تضيع لأنه كان طول الوقت مشغول في المحاكم وعند المحامي في قضية الخلع وقضايا النفقة للصغار ونفقة الحضانة
لكن المصيبة الاكبر لما الراجل ده بيعرف أن أم اولاده داخله حياه جديدة وفي عريس متقدم لها وهتتجوز ما هو الشرع حلل للمرأة أشياء أخرى زي ما حلل لك التعدد، وقتها بيفقد كل إحساس بالمتعة وبتكون إنتهت النزوة وبدأ البرود مع زوجته الجديدة، وتكتمل الصاعقة الكبرى أن العريس اللي أتقدم لأم اولاده واحد من أعز أصدقائه – مثلا – وأنها وافقت عليه، ويبدأ يبعت لها رسايل ووسطاء بلاش الجوازة دي انا عايز ارجعك أنا لسه بحبك، وترد عليهم بلغوه أن الشرع حلل للمرأة أشياء أخرى.
بعد فترة وجيزة أم الولاد أتجوزت، وهو يبدأ عنده الإحساس بالقهر والألم، وقتها يحس أنه بيموت ومش قادر يحس بطعم أي حاجة في حياته وأن الدنيا ماسخة ومن غير طعم ولا لون، بيعيش ميت وبيحس بالموت في كل لحظة يفكر فيها ويتخيل أنها في حضن راجل غيره بيموت بجد موت حقيقي بس عاجز ومش قادر يتصرف لأن الشرع حلل لها أشياء أخرى زي ما حلل له التعدد وقتها حياته بتتغير وبيحس أن الزوجة الجديدة كانت سبب التعاسة ودمار الأسرة وضياع حياته وحياة اولاده بعد انفصال الأبوين وبعد أن انتقلت حضانة الاولاد لجدتهم بعد زواج أمهم وأصبح بينه وبين أولاده فجوة كبيرة كان سببها دخول الست الجديدة في حياته وقتها بس بيأخد قراره بتطليق الزوجة_الثانية ويرتكب نفس الجريمة للمرة الثانية وهو مش دارى فيطلقها ويظلمها زي ما ظلم الاولى ويخسر كل حاجة وتضيع حياته بسبب نزوة دمرت كل حاجة
“الشرع حلل” ليك التعدد وحلل لها الطلاق والخلع والزواج من آخر، فكر كويس قبل ما تندم فكر يا بنى أدم وبلاش تخسر بيتك وحياتك وزوجتك وأولادك علشان نزوة المتعة فيها لحظات قليله وينتهى بيها كل شئ، فكر وبلاش تتسرع وتعالى نفكر سوا ونحسبها صح مكتبي مفتوح ليك في اي وقت زي ما هو مفتوح لها وللمطالبة بحقوقها طول الوقت فكر قبل فوات الاوان.